Audio Story: 聖地牙哥的海岸

聖地牙哥呢度嘅海岸線好長、好長，加州嘅海總係無邊無際。

望住遼闊嘅大海，唔駛任何氣力， 腦就自自然清空，全部煩惱暫時都唔見晒。

今日係星期二，亦都係Taco Tuesday，所以我都買咗幾個taco，同一杯凍嘅美式咖啡。然後一邊望住個海，一邊食住taco。

望向欄杆個一面，有個伯伯企上一舊大石。佢拎住一樣好特別嘅工具，望上去就好似兩條魚竿。佢將竹竿嘅尾部浸落一個大水桶，再慢慢舉起個竹竿。一瞬間，佢變出比西瓜更大嘅巨型泡泡，泡泡係藍天舞動。原來呢個係佢自製嘅吹泡泡工具。利用海風，加埋浸左番梘水嘅繩，就可以吹出巨型泡泡。

因為陽光嘅折射，巨型泡泡係夢幻嘅紫藍色。有個小朋友好興奮迎面咁撲向泡泡， 「卜」 一聲，個泡泡就消失得無影無蹤，就似生命同感情嘅幻滅。

我瞓係軟綿綿嘅白沙上面，棕櫚樹係頭頂隨風搖曳(jai6)，折射陽光嘅泡泡，繼續係半空飄過。我闔(hap6)埋雙眼，聽住海鷗嘅叫聲，聽著小朋友係度追逐嘅笑聲，伴隨住浪花一浪一浪嘅拍岸聲。

我嘅呼吸同脈搏，好似漸漸變得同海浪聲同步。

陽光灑落係皮膚，全身都被溫暖幼細嘅沙包圍。深呼吸嘅時候，會聞到海風飄送淡淡嘅海水味。

呢一個下晝好平靜，時間就好似係幻覺。成個人變得好輕盈，我覺得自己好似喺度漂浮，係宇宙飄流。

冇幾耐之後，我起身嘅時候，遼闊嘅天空、連綿嘅雲，都已經慢慢染上漸變嘅珊瑚色。

每一個日落，只係會得一次機會見到。地球每分每秒都喺度轉動，生命裡面，其實並唔存在一模一樣嘅日落。

但我望住前面嘅情侶，斜陽下擁抱嘅影子，佢哋好似置身係一個時間停頓嘅空間。我諗，佢哋留住咗個一剎那嘅無限。

或者只要活在當下，個一個瞬間就會成為永恆。

故事系列 #故事散步 將透過聲音帶著大家到不同角落散步，上一次我們帶你坐上通往宇宙的銀河鐵路。這晚上，我們回到地球，跟著Manson一起到美國的聖地牙哥海岸散步，讓煩惱暫時消失。請到Storyteller Radio Podcast 聽完整版吧。

Voice performance by Manson 張進翹 @mansonvibes

Animation by 黑豆 @blac_bean