Nescafe - Audio Story: 林二汶｜麻雀

[錄音稿]

望著呢幾隻肥嘟嘟嘅麻雀，阿妍突然問起：你知唔知，麻雀點樣沖涼架？

阿俊諗都唔使諗，就好自信咁答：「佢哋會跳入沙堆度沖涼架嘛。」

阿妍有啲驚訝，因為未養過雀仔嘅人多數都唔知。

每當講起雀仔，阿妍就會諗起爺爺，同埋爺爺做嘅雀籠。

以前細個嗰陣，爺爺會幫手湊佢放學。阿妍成日都會去爺爺舖頭，望住爺爺整雀籠。佢仲記得，爺爺戴起老花眼鏡，好專心，好安靜咁整雀籠嘅樣。

製作雀籠工序原來好繁複，爺爺有時要整一個月，有時甚至可能要整一年，先做好一個精緻嘅雀籠。

爺爺首先會鋸開竹枝，削薄竹枝，刮走面頭嘅蠟質，再打磨，其實淨係處理竹枝，已經要好多個步驟。仲要有咁上下功力，先可以扭出弧度一致既竹條。

阿妍細細個就已經講得出，咩先為之好嘅雀籠，爺爺話造工靚嘅雀籠呢，線條應該係好直，睇唔到接駁口，雕刻好精細。每一個步驟都唔可以求其，如果一唔小心，成個籠就會歪（音：me2）埋一邊架喇。爺爺仲話過：「俾心機做嘅雀籠，雀仔都會住得開心啲，個雀籠仲可以陪住主人好耐。」

十一歲生日個年，爺爺親手整咗一個獨一無二嘅雀籠比阿妍，成為佢隻鸚鵡仔嘅新屋企。

直到依家阿妍都好掛住爺爺，好想再一次，望住爺爺好專心咁整雀籠。

阿俊突然走咗入書房，然後拎住一個盒出嚟，裡面就係爺爺當年送畀佢嘅雀籠，原來佢搵左一位老師傅維修，本身諗住上年年尾應該整好，點知原來好複雜，等咗咁耐終於整好。

阿妍細心睇，雀籠每一格嘅大細同距離都好平均，亦睇唔出修補嘅痕跡。佢用指尖輕輕掃過木頭，係爺爺當年親自雕琢嘅雕花。其實就算要等多年，阿妍都唔會嫌耐，因為佢明白，一切精緻美麗嘅工藝品，都需要時間同一份執著。

「你知道麻雀是如何洗澡的嗎？」

看著麻雀，女生便想起爺爺。她的爺爺是一位雀籠工藝師，十一歲生日那年，爺爺親手製作了一個獨一無二的雀籠給她。直到現在，這位女生都仍然非常掛念爺爺，她很想再一次，望著爺爺專心地整作雀籠⋯⋯

這一晚，我們邀請了林二汶為我們說故事，讓我們隨著她的聲音，一起聽聽製作雀籠的繁複工序。即使製作雀籠需要花上不少時間，這位女生從來不會等得不耐煩，因為她明白，一切精緻美麗的工藝品，都需要時間和一份執著。

今晚，就讓我們來聽聽林二汶為我們說故事⋯⋯晚安：）

Credit:

Voice performance by 林二汶 @lam2

Animation by patpatkate @patpatkate

Audio editing by Melody Tam